नाशिक : सातपूर पपया नर्सरी जवळ भरधाव कंटेनरची दुचाकीला धडक; महिलेचा मृत्यू

नाशिक : सातपूर पपया नर्सरी जवळ भरधाव कंटेनरची दुचाकीला धडक; महिलेचा मृत्यू

नाशिक, दि. २८ नोव्हेंबर २०२५ :

सातपूर-त्र्यंबकरोडवरील पपया नर्सरीसमोरील कमानीजवळ भरधाव कंटेनरने दिलेल्या जोरदार धडकेत एका महिलेचा जागीच मृत्यू झाल्याची घटना गुरुवारी (दि. २७) सकाळी साडेअकराच्या सुमारास घडली. तीन दिवसांत झालेला हा दुसरा अपघाती बळी ठरला असून परिसरातील नागरिकांत तीव्र नाराजी व्यक्त होत आहे.

सातपूर पोलिसांनी दिलेल्या माहितीनुसार, गुजरातहून आलेला कंटेनर (जीजे ०६ बीटी ०२७१) पपया नर्सरी येथील सिग्नलवर थांबलेला असताना स्वाती संतोष बेल्हेकर (४८, रा. त्र्यंबकेश्वर) या आपल्या मोपेडवर (एमएच १५ केडी ९३७२) त्याच्या जवळ थांबल्या होत्या. सिग्नल सुटताच दोन्ही वाहने नाशिकच्या दिशेने निघाली. मात्र कंटेनरचालकाने वेग वाढवत दुचाकीला पाठीमागून धडक दिली. अचानक झालेल्या या धडकेत बेल्हेकर या वाहनाच्या चाकाखाली आल्याने त्यांचा जागीच मृत्यू झाला.

या घटनास्थळी मोठी गर्दी जमा झाली. गेल्या काही दिवसांत सातपूर परिसरात अवजड वाहनांची वाढलेली वर्दळ आणि ठिकठिकाणी कंटेनरची बेशिस्त पार्किंग यावरून नागरिकांनी संताप व्यक्त केला आहे. या अपघातानंतर सातपूरकरांनी अशा वाहतुकीवर नियंत्रण आणण्याची मागणी पुन्हा एकदा जोर धरू लागली आहे.

दरम्यान, या प्रकरणी कंटेनरचालकाविरुद्ध सातपूर पोलीस स्टेशनमध्ये गुन्हा दाखल करण्यात आला आहे