पर्यावरण आणि भक्तीचा अनोखा संगम!

‘देवजाल वेलफेअर फाउंडेशन’तर्फे बेल रोपांच्या वाटपाचा कार्यक्रम उत्साहात संपन्न

नाशिक: पवित्र श्रावण महिन्यातील चौथ्या सोमवारचे औचित्य साधून नाशिकमधील सिडको परिसरात धार्मिक भक्ती आणि पर्यावरण संवर्धनाचा सुंदर मिलाफ पाहायला मिळाला. सामाजिक क्षेत्रात अग्रेसर असलेल्या ‘देवजाल वेलफेअर फाउंडेशन’ (महाराष्ट्र राज्य) यांच्या वतीने आयोजित करण्यात आलेला भव्य बेल (बिल्व) 800 रोपांच्या मोफत वाटपाचा उपक्रम अत्यंत उत्साहात आणि भाविकांच्या उत्स्फूर्त प्रतिसादात संपन्न झाला. भगवान महादेवाला बेलपत्र अत्यंत प्रिय मानले जाते. श्रावणी सोमवारी शिवभक्त मंदिरात जाऊन महादेवाला बेलपत्र अर्पण करतात. मात्र, केवळ पाने वाहण्यापुरते मर्यादित न राहता प्रत्येक भक्ताने आपल्या घरी व परिसरात बेलवृक्ष लावून निसर्गाचे रक्षण करावे, या उद्देशाने ‘एक बेल वृक्ष महादेवासाठी, एक पाऊल निसर्गासाठी’ या संकल्पनेअंतर्गत हा उपक्रम राबवण्यात आला. “एक बेल वृक्ष शिवाला अर्पण, निसर्गाला संरक्षण” या आवाहनाला नागरिकांनी भरभरून प्रतिसाद दिला. हा कार्यक्रम सिडकोतील पाटील नगर, मनपसंद स्विट्सजवळील ‘श्री सिद्धेश्वर महादेव मंदिर’ परिसर येथे सकाळी १०:०० वाजता पार पडला. श्रावणी सोमवारनिमित्त मंदिरात दर्शनासाठी आलेल्या शेकडो शिवभक्तांना आणि निसर्गप्रेमींना बेल रोपांचे वाटप करण्यात आले. रोपे स्वीकारताना भाविकांच्या चेहऱ्यावर आनंदाचे आणि भक्तीचे वातावरण दिसून येत होते.

पर्यावरण आणि आरोग्यासाठी बेलाचे महत्त्व: यावेळी बोलताना संस्थेच्या प्रतिनिधींनी बेल वृक्षाचे धार्मिक तसेच पर्यावरणीय व औषधी महत्त्व विशद केले. बेल वृक्ष परिसर स्वच्छ आणि ऑक्सिजनयुक्त ठेवण्यास मदत करतो. तसेच आयुर्वेदात बेलाच्या पानांना आणि फळाला अत्यंत महत्त्व असून त्याचा औषधी उपयोग होतो. घरात किंवा परिसरात बेलवृक्ष लावल्याने समृद्धी आणि मानसिक शांतता लाभते, असे या प्रसंगी सांगण्यात आले.

‘देवजाल वेलफेअर फाउंडेशन’ ही संस्था महिला सक्षमीकरण, विद्यार्थी सक्षमीकरण आणि पर्यावरण संवर्धनासाठी सातत्याने कार्य करत असते. “निसर्ग आणि मानवता जपा, मनःशांती व पुण्य मिळवा” या ब्रीदवाक्याला जागून संस्थेने हाती घेतलेल्या या हरित उपक्रमाचे मंदिर संस्थान आणि स्थानिक नागरिकांनी विशेष कौतुक केले. कार्यक्रमाच्या यशस्वीतेसाठी संस्थेचे अध्यक्ष प्रमोद रनमाळे यांच्यास सर्व सदस्यांनी व स्थानिक स्वयंसेवकांनी विशेष परिश्रम घेतले. या उपक्रमामुळे परिसरात शेकडो नवीन बेल रोपांची लागवड होणार असून, भक्तीतून निसर्ग संवर्धनाचा एक नवा पायंडा या कार्यक्रमाच्या माध्यमातून पाडला गेला आहे.