मध्यपूर्व तणावाचा परिणाम; नाशिकमध्ये LPG सिलिंडर ६० रुपयांनी महाग

नाशिक | दि. ९ मार्च २०२६

प्रतिनिधी :/  मध्यपूर्वेतील वाढत्या तणावाचा परिणाम आता देशातील गॅस दरांवर दिसू लागला असून नाशिककरांनाही त्याचा फटका बसण्याची शक्यता आहे. तेल कंपन्यांनी घरगुती एलपीजी सिलिंडरच्या किमतीत ६० रुपयांची वाढ केली असून ही वाढ तात्काळ लागू करण्यात आली आहे.

या दरवाढीनंतर नाशिक शहरात १४.२ किलो घरगुती गॅस सिलिंडरचा दर सुमारे ९१५ रुपयांच्या आसपास पोहोचल्याची माहिती गॅस वितरकांकडून मिळत आहे. यापूर्वी शहरात हा दर सुमारे ८५६ रुपयांच्या आसपास होता.

दरम्यान, गॅस बुकिंगबाबत काही ठिकाणी नवीन नियम लागू करण्यात आल्याची चर्चा असून पहिल्या सिलिंडरनंतर दुसऱ्या सिलिंडरसाठी बुकिंग करण्यासाठी पूर्वीपेक्षा जास्त कालावधी ठेवावा लागणार असल्याची माहिती समोर येत आहे. त्यामुळे काही ग्राहकांमध्ये संभ्रमाचे वातावरण निर्माण झाले आहे.

नाशिकमधील गॅस वितरकांच्या मते, सध्या शहरात गॅसचा पुरवठा सुरळीत सुरू असून नागरिकांनी घाबरून मोठ्या प्रमाणात बुकिंग करण्याऐवजी नियमित वापरानुसारच गॅस बुक करावा, असे आवाहन करण्यात आले आहे.