GST कायद्यातील नवीन सवलती योजना करदात्यांना फायदेशीर – सीए स्वप्नील मुनोत यांचे प्रतिपादन

नाशिक प्रतिनिधी :/ जीएसटी कौन्सिल च्या ५३ व्या बैठकीमध्ये सुधारणा करण्यात येणार असून जीएसटी कायदयातील कलम १६ (४) मधील इनपुट टॅक्स क्रेडिट, कलम ७३ व ७४ अंतर्गत व्याज आणि दंड माफी, अँम्नेस्टी स्कीम अशा अनेक तरतुदी व निर्णय याबाबत व्यापारी वर्ग, कर सल्लागारांनी माहिती घेणे आवश्यक आहे. कलम १६ (४) बाबत व्यापाऱ्यांना इनपुट कराचे मिळणारे क्रेडिट, जीएसटी खात्याकडून नव्याने जाहीर होणारी सवलत योजना या बाबत करसल्लागारांनी सुद्धा सखोल माहिती घेऊन कामकाज करणे आवश्यक असल्याचे माहिती जीएसटी कायद्याचे अभ्यासक व तज्ञ सीए स्वप्नील मुनोत यांनी दिली. तसेच येणाऱ्या कालावधीमध्ये जीएसटी विवरणपत्रकातील होणारे बदल, नोंदणी बाबतच्या होऊ घातलेल्या नवीन तरतुदी, न्युट्रल अल्कोहोल, मालपुरवठादाराने व्यापाऱ्याला दिलेल्या डिस्काऊंट बाबत तसेच टीसीएस बाबतच्या तरतुदी, जीएसटी विभागाने जाहीर केलेली नवीन परिपत्रके, अनोंदणीकृत जीएसटी व्यापाऱ्याकडील खरेदी केलेल्या मालावरील आरसीएम बाबतच्या तरतुदी याबाबतचे त्यांनी विश्लेषण केले.

नॉर्थ महाराष्ट्र टॅक्स प्रॅक्टिशनर्स असोसिएशनच्या वतीने ५३ व्या जीएसटी कौन्सिलच्या बैठकीत घेण्यात आलेले महत्वपूर्ण निर्णयाबाबत कर सल्लागार, प्रॅक्टिशनर्स, ऍडव्होकेट, सीए तसेच व्यापारी वर्ग यांना याबाबत सखोल व अद्ययावत माहिती सोप्या भाषेत मिळावी याकरिता वेबिनारचे आयोजित करण्यात आले होते. या कार्यक्रमास संदीप हेडाऊ, उपायुक्त, सेंट्रल जीएसटी (ऑडिट) हे अध्यक्षस्थानी होते.  व्यवसाय, उद्योजकांना फायदा व्हावा यासाठी जीएसटी कायदयात सरकार कडून होत असलेले बदल हे जीएसटी करदात्यांना लाभदायक व हिताचे असल्याचे यावेळी त्यांनी सांगितले. जीएसटी ऑडिट मध्ये निर्माण होणाऱ्या अडचणी तसे हिशोब पत्रकांची पूर्तता, वेळेत पूर्ण करून जीएसटी ऑडिट साठी सहकार्य करावे असे आवाहन करत त्यांनी उपस्थितांना मार्गदर्शन केले. यावेळी सेंट्रल जीएसटी ऑडिटचे  उपआयुक्त अवधेश शर्मा तसेच सर्व सहायक आयुक्त मनोहर वाघ, वसंत तुपलोंढे, अशोक सरकार आदी उपस्थित होते.

कार्यक्रमाचे प्रमुख वक्ते यांचा परिचय सौ.नीता डोंगरे यांनी करून दिला. सूत्र संचालन सीए चेतन पाटील यांनी केले तर आभार प्रदर्शन श्री नयन निऱ्हाळी यांनी  केले. वेबिनार साठी उत्तर महाराष्ट्रातल्या अहमदनगर, नाशिक, मालेगाव, धुळे, याचबरोबर सोलापूर, सातारा, कोल्हापूर तसेच महाराष्ट्राबाहेरील कर व्यावसायिकांनी या वेबिनार साठी मोठ्या संख्येने हजेरी लावली.