हॉटेलमधील वॉशरूमच्या खिडकीतून महिलेचे काढले फोटो; त्र्यंबकेश्वरमधील प्रकार, विनयभंगाचा गुन्हा दाखल

हॉटेलमधील वॉशरूमच्या खिडकीतून महिलेचे काढले फोटो; त्र्यंबकेश्वरमधील प्रकार, विनयभंगाचा गुन्हा दाखल

शुक्रवारी सायंकाळी सव्वापाच वाजेच्या सुमारास बाहेरगावाहून देवदर्शनासाठी आलेल्या महिला दर्शन आटोपल्यानंतर माघारी जात असताना मंदिराच्या समोरच्या गल्लीतील एका हॉटेलमध्ये नाश्ता करण्यासाठी गेल्या होत्या. त्यातील एक महिला हॉटेलच्या वॉशरूममध्ये गेली असता तिला बाजूच्या खिडकीतून अज्ञात व्यक्ती मोबाइलने फोटो काढत असल्याचे लक्षात आले. तिने आराडाओरडा केला असता ती व्यक्ती पळून गेली. महिलांनी पोलिस ठाण्यात जाऊन हॉटेलमध्ये फोटो काढणाऱ्या अज्ञातासह हॉटेल मालकाविरुद्ध फिर्याद दाखल केली असून पोलिसांनी विनयभंगाचा गुन्हा दाखल केला आहे. या प्रकाराने त्र्यंबकनगरीत खळबळ उडाली आहे.

मंदिराची पूर्वदरवाजा दर्शनबारी वगळता इतरत्र स्वच्छतागृह नाही. चार-पाच तास रांगेत उभे राहिल्यानंतर दर्शन घेऊन बाहेर आल्यानंतर बहुसंख्य भाविकांना स्वच्छतागृहाची गरज भासते. मात्र, तशी सुविधा नसल्याने त्यासाठी आजूबाजूच्या हॉटेल अथवा लॉजिंगकडे भाविक धाव घेतात. मात्र, तेथे असे प्रकार घडू लागल्याने चिंता व्यक्त होत आहे.