नाशिकमध्ये मद्यधुंद तरुणींचा राडा – सिडको परिसर हादरला

 नाशिकमध्ये मद्यधुंद तरुणींचा राडा – सिडको परिसर हादरला

प्रतिनिधी :/  नाशिकमधील सिडको परिसरात शुक्रवारी रात्री घडलेल्या एका प्रकाराने शहर हादरले आहे. स्टेट बँक चौकात काही मद्यधुंद तरुणींनी मोठा गोंधळ घालून नागरिकांना हैराण केले.

स्थानिकांच्या म्हणण्यानुसार, या तरुणींनी केवळ शिवीगाळ केली नाही तर एका व्यक्तीची कॉलर पकडून त्याला मारहाण केली. अचानक सुरू झालेल्या या धिंगाण्यामुळे परिसरात तणावाचे वातावरण निर्माण झाले.

घटनेदरम्यान अनेकांनी मोबाईलवर व्हिडिओ रेकॉर्ड केले असून ते सोशल मीडियावर व्हायरल झाले आहेत. गोंधळ अधिक वाढल्यावर या तरुणींनी त्यांच्या साथीदारांना फोन केला. काही मिनिटांतच दुचाकींवर काही तरुण घटनास्थळी दाखल झाले व त्यांनी संबंधित तरुणींना घेऊन पसार केले.

याआधीही नाशिकच्या इंदिरानगर आणि गंगापूर भागात मद्यधुंद तरुणींनी गोंधळ घातल्याच्या घटना घडल्या आहेत. त्यामुळे नागरिकांच्या सुरक्षिततेचा प्रश्न पुन्हा एकदा ऐरणीवर आला आहे.

संपूर्ण घटनेचे सीसीटीव्ही फुटेज उपलब्ध असल्याने संबंधितांवर कठोर कारवाई करण्याची मागणी स्थानिक नागरिकांकडून होत आहे. कायद्याचा धाक निर्माण करण्यासाठी अशा घटनांवर पोलिसांनी तातडीने आणि कठोर पावले उचलणे गरजेचे असल्याचे मत व्यक्त केले जात आहे.