शहरातील वायरींचे जाळे डोकेदुखी…! रस्त्यांवर तुटून पडलेल्या वायरींमुळे अपघाताचा धोका

शहरातील वायरींचे जाळे डोकेदुखी…! रस्त्यांवर तुटून पडलेल्या वायरींमुळे अपघाताचा धोका

प्रशासनाची मात्र डोळेझाक

सिडको:/ शहरामध्ये इंटरनेट, फायबर ऑप्टिक बरोबरच इतर टीव्ही केबल नेटवर्क, दूरसंचार अशा अनेक प्रकारच्या सेवांसाठी शहरातील रस्ते, विदयुत खांब, इमारती, घरांसह झाडावर परवानगी न घेताच वायरींचे मोठ्या प्रमाणात जाळे पसरलेले असल्याने शहराचे विद्रुपीकरण होताना दिसत आहे.

अनेकदा तारा तुटून अपघात होण्याचा धोका असतो आणि काही ठिकाणी तर विद्युत पुरवठा खंडित होऊ शकतो अशी परिस्थिती निर्माण होऊ शकते. यामुळे परवानगी न घेता टाकण्यात आलेल्या वायर्स प्रशासनाने जप्त करत कठोर कारवाई करावी अशी मागणी नागरिकांकडून होत आहे. याचबरोबर प्रशासनाने केबल टाकण्यासाठी परवानगी देतानाचे आणि देखभालीच्या नियमांचे पालन केले जाईल, याची खात्री करणे आवश्यक असल्याची भावना नागरिकांकडून व्यक्त करण्यात करत आहे.

कोट

“कंपन्यांकडून प्रशासनाची, सोसायटीचे मालक यांची परवानगी न घेता मनमानी कामकाज”

मागील काही दिवसांपासून अंबड पोलीस स्टेशन, पेलिकन पार्क तसेच गणेश चौक रोड ठिकाणी वायर्स तुटून रस्त्यावर लटकलेल्या आहेत हा दुचाकीस्वारासाठी मोठा धोका निर्माण होऊन अपघात घडू शकतो. अशा रस्त्यावर तुटून पडलेल्या वायर्स बाबत ज्या कंपन्या दखल घेत नाही त्यांच्यावर कारवाई व्हावी व यामुळे कुणाचा अपघात झाल्यास त्याची सर्वस्वी भरपाई करण्यासाठी संबंधित कंपनीला जबाबदार धरावे. तसेच इमारती व घरांवरून वायर्स टाकताना संबंधित घरमालकांची परवानगी ही बंधनकारक करावी.

कुणाल विलास धात्रक 

सामाजिक कार्यकर्ते 

नवीन सिडको