खेळामुळेच व्यक्तिमत्व घडते : मनोहर कारंडे
नाशिक : मानवधन सामाजिक शैक्षणिक विकास संस्था संचलित सर्व शाळांचा एकत्रित वार्षिक क्रीडा महोत्सव गामने मळा येथे मोठ्या उत्साहात आणि जल्लोषात पार पडला. सकाळी लवकरच विद्यार्थ्यांच्या उपस्थितीने मैदान गजबजून गेले होते. रंगीबेरंगी पताका, घोषवाक्ये आणि संघांच्या गणवेशामुळे परिसरात क्रीडामय वातावरण निर्माण झाले होते.
कार्यक्रमाची सुरुवात मान्यवरांच्या हस्ते सरस्वती पूजन व क्रीडामशाल प्रज्वलनाने करण्यात आली. त्यानंतर विविध शाळांच्या विद्यार्थ्यांनी केलेल्या शिस्तबद्ध संचलनाने उपस्थितांचे लक्ष वेधून घेतले. तालबद्ध पावलांनी केलेल्या मार्चपास्टमधून विद्यार्थ्यांची शिस्त, एकजूट आणि तयारी स्पष्ट दिसून येत होती.
या वेळी प्रमुख पाहुणे म्हणून वरिष्ठ पोलीस निरीक्षक मनोहर कारंडे, तसेच नाशिक क्रिकेट असोसिएशन चे अध्यक्ष विनोद शहा, रॅफलिंग फेडरेशन ऑफ इंडिया चे टेक्निकल डायरेक्टर संतोष देशमुख, डी.डी. प्रॉफिट प्लसचे संचालक दशरथ धोंगडे, संस्थापक अध्यक्ष डॉ. प्रकाश दादा कोल्हे, संस्था सचिव ज्योती कोल्हे यांच्यासह विविध शाळांचे मुख्याध्यापक, शिक्षक व पालक मोठ्या संख्येने उपस्थित होते.
क्रीडा महोत्सवात विद्यार्थ्यांनी साहित्य कवायत, सूर्यनमस्कार आणि तलवारबाजी यांसारखी नेत्रदीपक प्रात्यक्षिके सादर केली. या सादरीकरणातून विद्यार्थ्यांमधील आत्मविश्वास आणि शारीरिक तंदुरुस्तीची झलक पाहायला मिळाली. लहान गटांपासून मोठ्या गटांपर्यंत विविध वयोगटांसाठी लिंबू-चमचा, कांगारू रेस, १०० मीटर धावणे, अडथळा शर्यत, रिले रेस, खो-खो आणि कबड्डी अशा स्पर्धांचे आयोजन करण्यात आले होते. प्रत्येक स्पर्धेत विद्यार्थ्यांनी जिद्दीने आणि क्रीडास्पर्धेच्या भावनेने सहभाग घेतला.
प्रमुख पाहुणे मनोहर कारंडे यांनी आपल्या मार्गदर्शनपर भाषणात सांगितले की, “बालवयातच शिस्त, संस्कार आणि खेळाची आवड निर्माण झाली तर विद्यार्थ्यांचे सर्वांगीण व्यक्तिमत्त्व घडते. खेळामुळे केवळ शारीरिक सुदृढता वाढत नाही, तर मानसिक ताकद, संघभावना, नेतृत्वगुण आणि संकटांना सामोरे जाण्याची तयारीही निर्माण होते.” त्यांनी विद्यार्थ्यांना नियमित व्यायाम आणि खेळ यांचा अंगीकार करण्याचे आवाहन केले.
कार्यक्रमाच्या शेवटी स्पर्धांतील विजेत्या विद्यार्थ्यांना मान्यवरांच्या हस्ते मेडल व प्रमाणपत्र देऊन गौरविण्यात आले. विजेता संघांना फिरती ढाल प्रदान करण्यात आली. विद्यार्थ्यांच्या यशस्वी कामगिरीबद्दल शिक्षक व पालकांनी समाधान व्यक्त केले.
शिक्षक, पालक, स्वयंसेवक आणि विद्यार्थ्यांच्या उत्स्फूर्त सहकार्यामुळे वार्षिक क्रीडा महोत्सव आनंदी, शिस्तबद्ध आणि यशस्वी वातावरणात संपन्न झाला. हा महोत्सव विद्यार्थ्यांच्या सर्वांगीण विकासासाठी प्रेरणादायी ठरला.
