खासदार निलेश लंके यांच्या उत्तम आरोग्यासाठी काळाराम मंदिरात भावपूर्ण अभिषेक; सागर नागरे व पत्नी प्रियंका नागरे यांची ईश्वरचरणी प्रार्थना
नाशिक : जनतेच्या सुख-दुःखात सदैव धावून जाणारे, सर्वसामान्यांच्या प्रश्नांसाठी अहोरात्र झटणारे आणि समाजसेवेला आयुष्य समर्पित करणारे अहमदनगर लोकसभा मतदारसंघाचे खासदार निलेश लंके यांची प्रकृती गेल्या काही दिवसांपासून अस्वस्थ असल्याची माहिती समोर आल्यानंतर त्यांच्या असंख्य समर्थकांच्या मनात चिंता निर्माण झाली आहे. अनेक गरजू कुटुंबांना आधार देणारे आणि जनतेच्या प्रश्नांसाठी सातत्याने लढणारे लंके साहेब लवकरात लवकर पूर्णपणे बरे व्हावेत, अशी भावना राज्यभरातून व्यक्त होत आहे.
याच भावनेतून नाशिकमधील सामाजिक कार्यकर्ते सागर नागरे आणि त्यांच्या पत्नी प्रियंका नागरे यांनी निलेश लंके प्रतिष्ठानच्या सहकार्याने काळाराम मंदिर येथे विशेष अभिषेक करून ईश्वरचरणी मनोभावे प्रार्थना केली. मंदिरातील भक्तिमय वातावरणात करण्यात आलेल्या या अभिषेकावेळी “देवा, जनतेसाठी रात्रंदिवस झटणाऱ्या निलेश लंके साहेबांना उत्तम आरोग्य लाभू दे. त्यांना लवकर बरे कर आणि पुन्हा नव्या जोमाने जनतेच्या सेवेसाठी उभे राहण्याची शक्ती दे,” अशी भावपूर्ण प्रार्थना करण्यात आली.
यावेळी सागर नागरे म्हणाले, “निलेश लंके साहेब हे केवळ खासदार नाहीत, तर सर्वसामान्य जनतेच्या आशा-अपेक्षांचे केंद्र आहेत. गरीब, शेतकरी, कामगार आणि गरजू नागरिकांच्या मदतीसाठी ते नेहमीच तत्पर असतात. त्यांच्या प्रकृतीबाबत माहिती मिळताच आम्हाला खूप वाईट वाटले. म्हणून मी आणि माझी पत्नी प्रियंका नागरे यांनी काळाराम मंदिरात अभिषेक करून त्यांच्या लवकर स्वास्थ्यासाठी देवाकडे साकडे घातले.”
प्रियंका नागरे यांनीही भावना व्यक्त करत सांगितले की, “जनतेची सेवा करणारा माणूस लवकर बरा व्हावा, हीच आमची मनापासून इच्छा आहे. निलेश लंके साहेबांना ईश्वराने उत्तम आरोग्य आणि दीर्घायुष्य द्यावे.”
या प्रसंगी उपस्थित कार्यकर्त्यांच्या चेहऱ्यावरही लंके साहेबांविषयीचे प्रेम, आदर आणि आत्मीयता स्पष्टपणे दिसून येत होती. ज्यांनी हजारो लोकांच्या अडचणीच्या काळात मदतीचा हात दिला, त्या लोकनेत्याला ईश्वराने लवकर बरे करावे, अशी भावना सर्वांनी व्यक्त केली.
राज्यभरातून खासदार निलेश लंके यांच्या प्रकृतीत लवकर सुधारणा व्हावी यासाठी शुभेच्छांचा वर्षाव होत असून, ते पुन्हा पूर्ण ताकदीने जनसेवेत सक्रिय होतील, असा विश्वास त्यांच्या समर्थकांनी व्यक्त केला आहे.
