सेंट्रल पार्क (पेलिकन पार्क) मधील निलगिरीचे झाड उन्मळून पडले; वाहतूक विस्कळीत

सेंट्रल पार्क मधील निलगिरीचे झाड उन्मळून पडले; वाहतूक विस्कळीत

सुदैवाने कोणतीही जीवितहानी नाही

नवीन नाशिक (प्रतिनिधी)/ गेल्या दोन दिवसांपासून सुरू असलेल्या मुसळधार पाऊस आणि सोसाट्याच्या वाऱ्यामुळे शहरात आणि परिसरात मोठा प्रमाणात जनजीवन विस्कळीत झाले आहे. सततच्या पावसामुळे जमिनीतील माती सैल होऊन शहरात अनेक ठिकाणी महाकाय वृक्ष मुळासकट उन्मळून रस्त्यावर कोसळल्याच्या घटना घडल्या आहेत.

दरम्यान आज दुपारी १२.३० च्या सुमारास सिडको येथील सेंट्रल पार्क (पेलिकन पार्क) मधील महाकाय असे निलगिरीचे झाड थेट रस्त्याच्या बाजूने मुळासकट रस्त्याच्या पलीकडे घरांवर कोसळले आहे. सुदैवाने यात कोणतीही जीवितहानी झाली नसली, तरी घराचे व शेडचे नुकसान झाले आहे. या घटनेमुळे परिसरातील वीजपुरवठा खंडित झाला असून रस्त्यावरीलवरील वाहतूक ४-५ तास पूर्णपणे बंद होती. घटनेची माहिती मिळताच महापालिकेच्या उद्यान विभाग, अग्निशामक दलाचे अधिकारी व कर्मचारी यांनी तात्काळ घटनास्थळी धाव घेतली. कटरच्या साहाय्याने झाडाच्या फांद्या कापून रस्ता मोकळा करण्याचे काम युद्धपातळीवर सुरू करण्यात आले. सुमारे तीन ते चार तासांच्या अथक प्रयत्नांनंतर वाहतूक पूर्ववत करण्यात यश आले.

“मोठा अनर्थ टळला”

 नेहमीप्रमाणे मुलांना शाळेतून घरी आणण्यासाठी गेलो असता रस्त्यावर मोठे निलगिरीचे झाड कोसळलेले दिसून आले. सुदैवाने त्या वेळेस रस्त्यावरून कोणी जात नव्हते, अन्यथा मोठी दुर्घटना घडली असती. ताबडतोब अग्निशामक दल व मनपा प्रशासनाला याबाबत माहिती दिली. सेंट्रल पार्क भिंतीलगत रस्त्याच्या कडेला मोठ मोठे निलगिरीची झाडे आहे मात्र याची देखभाल, छाटणी केल्याचे आजवर निदर्शनास आलेले नाहीत. या रस्त्याने मोठी वाहतुकीची वर्दळ सुरू असते विशेषता १२ ते १ च्या दरम्यान मोठ्या प्रमाणावर शालेय विद्यार्थी जात येत असतात. मनपा प्रशासनाने अशा घटनांमधून धडा घेऊन योग्य ती कारवाई करावी.

–योगेश कातकाडे

“धोकादायक वृक्ष छाटणी साठी प्रशासनाकडे पाठपुरावा सुरू”

उन्मळून पडलेल्या झाडाची या अगोदरच उद्यान विभागाकडे तक्रार दिलेली होती परंतु, कोर्टाचा वृक्ष छाटणी/तोडणी बाबत मनाई आदेश असल्यामुळे येथील झाडाच्या फांद्या छाटता आल्या नाहीत त्यातच मुसळधार पावसाच्या ओलाव्यामुळे आणि वृक्ष मोठ्या प्रमाणात वाढल्यामुळे मुळासकट कोसळले. सुदैवाने कुठलीही जीवित व वित्त हानी झाली नाही. अग्निशामक दल व मनपा उद्यान विभागाच्या कर्मचाऱ्यांच्या मदतीने तत्काळ मदतकार्य सुरू करून या ठिकाणी रस्त्यावरील वाहतूक सुरळीत करण्यात आली.

सौ. छायाताई दिलीप देवांग

नगरसेविका प्रभाग २९