नाशिकसह सिडको परिसरात भूकंपाचे सौम्य धक्के!

नाशिक : शहरासह सिडको परिसरात शनिवारी (८ ऑगस्ट) रात्री सुमारे १० वाजून ०२ मिनिटांनी भूकंपाचे सौम्य धक्के जाणवले. अचानक झालेल्या या धक्क्यांमुळे नागरिकांमध्ये काही काळ भीतीचे वातावरण निर्माण झाले. अनेकांनी घरातील पंखे, खिडक्या व इतर वस्तू हलल्याचे सांगितले.  प्राथमिक माहितीनुसार, रात्री १० वाजून ०० मिनिटे ५९ सेकंदांनी रिश्टर स्केलवर ४.३ तीव्रतेचा भूकंप नोंदविण्यात आला. या भूकंपाचा केंद्रबिंदू नाशिकपासून सुमारे ४८ किलोमीटर उत्तर-पश्चिम (NNW) दिशेला असून तो जमिनीखाली पाच किलोमीटर खोलीवर होता.

भूकंपाचे धक्के सिडको, नवीन नाशिक, पंचवटी तसेच शहराच्या काही अन्य भागांमध्येही जाणवले. धक्का जाणवताच काही नागरिक घराबाहेर पडले. मात्र, या भूकंपामुळे कोणतीही जीवितहानी किंवा मालमत्तेचे नुकसान झाल्याचे वृत्त रात्री उशिरापर्यंत प्राप्त झाले नव्हते.  गेल्या काही दिवसांपासून जिल्ह्यात भूकंपीय हालचालींची नोंद होत असल्याने नागरिकांमध्ये चर्चेला उधाण आले आहे. दरम्यान, प्रशासनाने नागरिकांना अफवांवर विश्वास न ठेवता अधिकृत माहितीकडे लक्ष देण्याचे आवाहन केले आहे.