पंतप्रधान माेदींच्या सभेसाठी १० पार्किंगस्थळे निश्चित; उद्या वाहतूक मार्गात बदल

नाशिक | तपाेवन, साधूग्राम परिसरातील मैदानावर पंतप्रधान नरेंद्र माेदी यांची सभा हाेत असल्याने या भागातील रस्त्यांवर हाेणारी गर्दी लक्षात घेता वाहतूक मार्गात बदल करण्यात आले आहेत. शहर वाहतूक शाखेकडून शुक्रवारी (दि. ८) सकाळी १० वाजेपासून सभा संपेपर्यंत ११ मार्गांवर बदल करण्यात येऊन पर्यायी मार्ग जाहीर करण्यात आले आहेत. सभेसाठी विविध जिल्ह्यांसह गावांतून येणाऱ्या नागरिकांसह अन्य वाहनचालकांनी बंदी असलेल्या मार्गांऐवजी पर्यायी वाहनांचा वापर करावा, निश्चित करून देण्यात आलेल्या १० वाहनतळांवरच वाहने उभी करावीत, असे आवाहन उपायुक्त चंद्रकांत खांडवी यांनी केले आहे. हे निर्बंध पोलिस सेवेतील वाहने, रुग्णवाहिका व अग्निशमन दलाची वाहने, तसेच स्थानिक नागरिकांच्या वाहनांना लागू राहणार नाहीत, अशी अधिसूचना पाेलिसांकडून जाहीर करण्यात आली आहे.

—-

जाहिरात

असा असतील बदल..

– वणी-दिंडोरीरोड व पेठरोड बाजूकडून येणारी वाहतूक तसेच त्या भागातील नागरिकांनी आपली वाहने आर. टी. ओ. सिग्नल दिंडोरीरोडने येत डावीकडे वळण घ्यावे. रासबिहारी चौफुली येथे आल्यानंतर मुंबई-आग्रारोड ओलांडून निलगिरी बाग, सिध्दीविनायक लॉन्ससमोर वाहने पार्क करून पायी तपोवन नर्सरीपर्यंत पाेहाेचावे.

– मुंबई बाजूकडून येणारी वाहने ही मुंबई-आग्रा रोडने जुना मुंबईनाका, व्दारका सर्कल, टाकळी फाटा येथून उजवीकडे वळून तिग्रानीया कंपनी रोडने ट्रॅक्टर हाऊस समोरून (जुना सायखेडारोड) काशी माळी मंगल कार्यालयापासून गोदावरी घाट येथे पार्क करावीत. त्यानंतर पायी तपोवन नर्सरी रोडने सभेच्या ठिकाणी जावे.

– पुणे बाजूसह अहमदनगर, शिर्डी, संगमनेर, सिन्नर, पळसे, एकलहरे, नाशिकरोड, देवळाली कॅम्प, भगूर या भागाकडून सभेसाठी येणारी वाहने ही नाशिकरोड रेल्वे ब्रिजच्या डाव्या बाजूने खाली उतरून बिटको सिग्नल येथून उजव्या बाजूला वळून जेलरोडने दसक, नांदूरनाका सिग्नल येथून डाव्या बाजूला वळतील. तेथून छत्रपती संभाजीनगर रोडने मिर्ची ढाबा सिग्नल येथे येऊन डाव्या बाजूने जेजूरकर मळ्यासमोरील मोकळ्या जागेत वाहने उभी करावी लागतील. तेथून पायी छत्रपती संभाजीनगर रोडने सभेच्या ठिकाणी जावे.

– छत्रपती संभाजीनगर बाजूकडून येणारी म्हणजेच येवला, लासलगाव, निफाड, विंचूर, चांदोरी, सायखेडा, चेहेडी, ओढा, लाखलगाव, शिलापूरकडून येणारी वाहने ही छत्रपती संभाजीनगर रोडने येऊन जनार्दन स्वामी मठाजवळ इंद्रायणी लॉन्ससमोर पार्क करून पायी तपोवन नर्सरी रोडने सभेच्या ठिकाणी जातील.

– धुळे, मालेगाव, चांदवड, सटाणा, देवळा, पिंपळगाव बसवंत, ओझर या भागातून सभेसाठी येणारी वाहने रासबिहारी बळीमंदीर येथून डावीकडे वळून डाळिंब मार्केट याठिकाणी पार्क करावी लागतील. तेथून छत्रपती संभाजीनगर रोडने पायी तपोवन नर्सरी रोडने सभेच्या ठिकाणी जातील.

– मुंबई-आग्रारोडने धुळे, मालेगाव या भागातून येणाऱ्या लहान वाहनांना उड्डाणपुलावरून मुंबईकडे जाता येईल.

– मुंबई बाजूकडून येणारी लहान वाहने ही थुळ्याकडे जाताना पुलाखालून न जाता द्वारका रॅम्पवरून दोन्हीकडे जातील.

– मुंबईकडून छत्रपती संभाजीनगरकडे जाणारी वाहने द्वारकामार्गे बिटको चौक जेलरोडने नांदूरनाका मार्गे छत्रपती संभाजीनगरकडे जातील.

– नाशिक शहरातून येणारी वाहने काट्या मारुतीकडून उजव्या बाजूला वळून टकलेनगर, कृष्णानगर, तपोवन क्राॅसिंग करून तसेच संतोष टी पाॅइंट येथून उजव्या बाजूला वळून तपोवनरोडने तसेच लक्ष्मी नारायण लॉग्ससमोरून चौफुली आलांडून तपोवनरोडने कपिला संगमच्या पुढे जातील. तेथे वाहने उभी करून पायी सभेच्या ठिकाणी जातील.

– शहरातील दुचाकी लक्ष्मी नारायण मंदिरासमोरून तपोवनरोडच्या उजव्या बाजूला बुटुक हनुमान मंदीर येथील मोकळ्या जागेत उभ्या करून पायी सभेच्या ठिकाणी जावे.

– खासदार, आमदार, शासकीय व पोलिस अधिकारी व कर्मचारी यांची वाहने साधुग्रामजवळील कमानीच्या उजव्या बाजूकडील मोकळ्या जागेत पार्क करावी लागतील.