जिल्हा मध्यवर्ती बँकेचे प्रशासक चव्हाण यांचा राजीनामा

जिल्हा मध्यवर्ती बँकेचे प्रशासक चव्हाण यांचा राजीनामा

नाशिक प्रतिनिधी/ एनपीए वाढल्याने अडचणीत सापडलेली नाशिक जिल्हा मध्यवर्ती बँकेला अनेक दिवसांपासून आर्थिक अडचणीचा सामना करत आहे. कोणत्या ना कोणत्या कारणामुळे जिल्हा मध्यवर्ती बँकेत सतत वाद चालू असल्याचे दिसून येत आहे. यातच बँकेचे प्रशासक प्रतापसिंह चव्हाण यांनी आपल्या पदाचा राजीनामा ईमेल द्वारे वरिष्ठांकडे पाठवला असून त्यांच्या जागी बाळासाहेब देशमुख यांची प्रशासक पदी नियुक्तीची चर्चा होताना दिसत आहे.

याबाबत प्रशासक चव्हाण यांच्याशी संपर्क साधला असता त्यांनी याबाबत काही न बोलण्याची भूमिका घेत ‘योग्य वेळी बोलू’ असे सांगत बोलण्यास नकार दिला.

प्रशासक चव्हाण यांनी बँकेचे कामकाज पाहत असताना कर्ज वसुलीसाठी थकबाकीदारांकडे तगादा लावत कर्जवसुलीसाठी मोहीम चालवली होती. या मोहिमेला अनेक अडचणींचा सामना करावा लागला असल्याने अपेक्षित वसुली होऊ शकली नाही. याच दरम्यान थकबाकी वसुली बरोबरच चव्हाण यांनी त्यांच्या प्रशासकीय कार्यकाळात बँकेत शिस्त आणण्यासाठी विशेष उपाययोजना केल्या. यात कर्मचाऱ्यांबाबत काही कोठर निर्णय घेत असताना कर्मचाऱ्यांचे वेतन कपाती व शिस्तभंगाच्या कारवाई यांचा देखील समावेश होता. कर्ज वसुलीसाठी राबवलेली मोहीम तसेच सक्तीच्या कर्ज वसुली बाबत शेतकरी संघटनांचा चव्हाण यांच्या भूमिकेला तीव्र विरोध होता.