महापालिका प्रशासनाने गांभीर्याने दखल घ्यावी – स्थानिक नागरिकांची मागणी

सिडको प्रतिनिधी:/ अवकाळी पावसाने शहरासह नाशिक जिल्ह्यामध्ये थैमान घातल्याने अनेक भागांमध्ये पूरसदृश्य परिस्थिती निर्माण झाली होती याचबरोबर पावसाळी नाले, गटारी, रस्त्यांवर मोठ्या प्रमाणावर पाणी साचलेले होते तर काही ठिकाणी वृक्ष उन्मळून पडल्याने मोठे नुकसान ही झाले आहे.

असाच एक प्रकार नवीन नाशिक मधील तानाजी चौक भागात निदर्शनास आला आहे. या ठिकाणी पावसाळी नाल्याचा मोठा भाग खचल्यामुळे नाल्याला मोठे भगदाड पडले आहे. चौकाकडे जाणाऱ्या हा मुख्य रस्ता असून या रस्त्यावरून सतत रहदारी चालू असते त्यामुळे येथे अपघात होण्याची दाट शक्यता असून नागरिक तसेच वाहनधारक या ठिकाणाहून जाताना जीव मुठीत भरून चालावे लागत आहे. मनपा प्रशासन आहे याची दखल घेऊन त्वरित दुरुस्ती करावी अशी मागणी स्थानिक नागरिक करत आहेत.

तानाजी चौकाच्या मुख्य रस्तावर अंडरग्राउंड पावसाळी नाल्याला मोठा खड्डा पडलेला आहे. रस्त्यातील काँक्रीटचे गज अक्षरशः बाहेर आलेले आहे. या ठिकाणी रस्त्यावर मनपाकडून लाईट देखील बसवलेल्या नसल्याने रात्रीच्या अंधारात हा खड्डा दिसून येत नाही यामुळे येथे मोठा अपघात होण्याची शक्यता आहे. आम्ही लोकप्रतिनिधींकडे याबाबत तक्रारी दिलेल्या आहेत. मात्र, अद्याप याची कोणीही दखल घेतलेली नाही. महापालिका प्रशासनाने परिस्थितीचे गांभीर्य ओळखून त्वरित पावसाळी नाल्याची दुरुस्ती करून याठिकाणी रस्त्यालगत लाईट बसविण्यात यावी अशी आमची मागणी आहे