🚦 ४० सिग्नलवर हाय-टेक नजर; २० हजार नियमभंग कॅमेऱ्यात, ३५ जणांवर ई-चलान कारवाई

ही कारवाई २४ तास रात्रंदिवस सुरू राहणार!

नाशिक : शहरातील वाढती वाहतूक कोंडी, सिग्नल जंपिंग आणि अपघातांचे प्रमाण रोखण्यासाठी नाशिक शहर पोलीस आयुक्तालय अंतर्गत वाहतूक शाखेने कठोर कारवाईचा बडगा उगारला आहे. शहरातील ४० प्रमुख चौकांवर बसविण्यात आलेल्या अत्याधुनिक सीसीटीव्ही कॅमेऱ्यांद्वारे नियम तोडणाऱ्या वाहनधारकांवर ई-चलान प्रणालीमार्फत कारवाई सुरू करण्यात आली आहे. पहिल्याच टप्प्यात तब्बल २० हजार वाहनधारक नियमभंग करताना कॅमेऱ्यात कैद झाले असून, प्राथमिक पडताळणीनंतर ३५ जणांना दंडाच्या नोटिसा पाठविण्यात आल्या आहेत.

गेल्या काही आठवड्यांत शहरात सिग्नल तोडणे, लाल दिवा असतानाही चौक ओलांडणे, झेब्रा क्रॉसिंगच्या पुढे वाहन उभे करणे, सीटबेल्ट न लावणे अशा प्रकारांत लक्षणीय वाढ झाली होती. विशेषतः रात्रीच्या वेळी सिग्नल बंद असल्याचा गैरसमज करून अनेक वाहनचालक वेगाने चौक पार करत होते. यामुळे अपघातांचा धोका वाढत असल्याचे पोलिसांच्या निदर्शनास आले. या पार्श्वभूमीवर शुक्रवार (दि. २०) पासून शहर वाहतूक शाखेने सर्व ४० प्रमुख सिग्नल चौकांवर ई-चलान कारवाईची मोहीम सुरू केली. अत्याधुनिक कॅमेरे वाहनांच्या नंबर प्लेट्स स्पष्ट टिपत असून, उल्लंघनाची वेळ, ठिकाण आणि प्रकार याची नोंद स्वयंचलित प्रणालीद्वारे केली जाते.

अशी चालते ई-चलान प्रक्रिया : वाहनाने नियम तोडताच कॅमेरा त्या वाहनाचा फोटो आणि व्हिडिओ क्लिप रेकॉर्ड करतो. ही माहिती तात्काळ वाहतूक नियंत्रण कक्षात पाठवली जाते. तेथे अधिकाऱ्यांकडून प्राथमिक पडताळणी केल्यानंतर संबंधित वाहनमालकाच्या नोंदणीकृत मोबाईल क्रमांकावर दंडाची रक्कम व उल्लंघनाचा फोटोसह ई-चलान पाठवण्यात येतो. पहिल्या दिवशी २० हजारांहून अधिक नियमभंग नोंदले गेले. त्यातील पडताळणी पूर्ण झालेल्या ३५ प्रकरणांमध्ये तत्काळ दंडाची नोटीस बजावण्यात आली आहे. उर्वरित प्रकरणांची तपासणी सुरू असून पुढील काही दिवसांत मोठ्या प्रमाणावर ई-चलान पाठवले जाण्याची शक्यता आहे.

रात्री विशेष लक्ष : वाहतूक पोलिसांनी स्पष्ट केले आहे की, ही कारवाई २४ तास रात्रंदिवस सुरू राहणार आहे. विशेषतः रात्रीच्या वेळेत सिग्नल तोडणाऱ्यांवर विशेष लक्ष केंद्रित केले जाणार आहे. अनेक अपघात रात्रीच्या सुमारास होत असल्याने कॅमेऱ्यांची नजर अधिक तीक्ष्ण ठेवण्यात येणार आहे. पोलिस आयुक्तालयातील नियंत्रण कक्षातून सर्व चौकांवर सतत देखरेख ठेवली जात आहे. नागरिकांनी वाहतुकीचे नियम काटेकोरपणे पाळावेत, सिग्नलचे पालन करावे आणि सुरक्षिततेला प्राधान्य द्यावे, असे आवाहन वाहतूक विभागाकडून करण्यात आले आहे. “दंडात्मक कारवाई हा उद्देश नसून अपघात टाळणे आणि वाहतूक शिस्तीत आणणे हा मुख्य हेतू आहे. नागरिकांनी सहकार्य करावे,” असेही पोलिसांनी स्पष्ट केले. शहरातील वाहतूक सुरळीत करण्यासाठी आणि अपघातांचे प्रमाण कमी करण्यासाठी सुरू केलेली ही ई-चलान मोहीम पुढील काळात अधिक व्यापक स्वरूपात राबविण्यात येणार असल्याचे संकेत मिळत आहेत.