५ कोटींचे सभागृह पाडणार; त्र्यंबकेश्वरमध्ये ५१ कोटींची नवी इमारत उभारणार

नाशिक | त्र्यंबकेश्वर |प्रतिनिधी

त्र्यंबकेश्वर येथे नारायण नागबळी विधीसाठी उभारण्यात आलेले सुमारे ५ कोटी रुपयांचे सभागृह पाडून त्याच ठिकाणी ५१ कोटी रुपयांची नवीन इमारत उभारण्याचा निर्णय घेण्यात आला आहे. विस्तारित दर्शनपथ प्रकल्पासाठी हे सभागृह अडथळा ठरत असल्याने हा निर्णय घेतला गेला.

त्र्यंबकेश्वर मंदिर हे १२ ज्योतिर्लिंगांपैकी एक प्रमुख धार्मिक स्थळ असल्याने येथे वर्षभर भाविकांची मोठी गर्दी असते. नारायण नागबळी व त्रिपिंडी विधीसाठी देशभरातून भाविक येथे येतात.

केंद्र सरकारच्या प्रसाद योजनेतून सुमारे ५ कोटी रुपये खर्चून हे सभागृह काही वर्षांपूर्वी बांधण्यात आले होते. मात्र, सिंहस्थ कुंभमेळा लक्षात घेऊन तयार करण्यात आलेल्या सुमारे ३९० कोटी रुपयांच्या विस्तारित दर्शनपथ आराखड्यात हे सभागृह अडथळा ठरत असल्याने ते पाडले जाणार आहे.

या प्रकल्पांतर्गत घाटांचे सुशोभीकरण, कॉरिडॉर उभारणी व भाविकांसाठी आधुनिक सुविधा विकसित केल्या जाणार असून, नारायण नागबळी विधीसाठी नवीन व अधिक सुविधायुक्त इमारतीसाठी ५१ कोटी रुपयांची तरतूद करण्यात आली आहे.

दरम्यान, आधीच बांधलेले सभागृह पाडण्याचा निर्णय घेतल्याने सरकारी निधी वाया गेल्याची चर्चा स्थानिक स्तरावर सुरू आहे.