जेलरोड परिसर हादरला! पत्नी आणि ७ वर्षीय मुलाची निर्घृण हत्या; पतीचा आत्महत्येचा प्रयत्न

🚨 जेलरोड परिसर हादरला! पत्नी आणि ७ वर्षीय मुलाची निर्घृण हत्या; पतीचा आत्महत्येचा प्रयत्न

नाशिक | प्रतिनिधी

नाशिकच्या जेलरोड परिसरातील गोकुळनगर येथे सोमवारी सकाळी उघडकीस आलेल्या दुहेरी हत्याकांडाने संपूर्ण शहर हादरले आहे. एका ५४ वर्षीय व्यक्तीने कौटुंबिक वादातून आपल्या पत्नी आणि ७ वर्षीय मुलाची धारदार शस्त्राने हत्या केल्याचा प्राथमिक संशय पोलिसांनी व्यक्त केला आहे. त्यानंतर आरोपीने विष प्राशन करून आत्महत्येचाही प्रयत्न केल्याचे समोर आले आहे.

मिळालेल्या माहितीनुसार, शेजाऱ्यांना संशय आल्याने त्यांनी घरात डोकावून पाहिले असता पत्नी आणि मुलगा मृतावस्थेत आढळले, तर आरोपी बेशुद्ध अवस्थेत पडलेला होता. यानंतर तातडीने पोलिसांना माहिती देण्यात आली. पोलिसांनी आरोपीला उपचारासाठी रुग्णालयात दाखल केले असून त्याच्यावर पोलिस बंदोबस्तात उपचार सुरू आहेत.

प्राथमिक तपासात कौटुंबिक कलहातून ही घटना घडल्याचा अंदाज व्यक्त करण्यात येत आहे. घटनेमागील नेमके कारण शोधण्यासाठी नाशिक रोड पोलीस सखोल तपास करत असून पुढील तपास सुरू आहे.