खाकी वर्दीने जोपासली सामाजिक बांधिलकी; गुरुपौर्णिमा निमित्ताने कर्णबधिर विद्यालयाला ५१ हजारांचे शैक्षणिक साहित्य भेट

खाकी वर्दीने जोपासली सामाजिक बांधिलकी; गुरुपौर्णिमा निमित्ताने कर्णबधिर विद्यालयाला ५१ हजारांचे शैक्षणिक साहित्य भेट

अंबड पोलीस ठाण्यातील दिपक विष्णू निकम यांच्या प्रेरणादायी उपक्रम 

नाशिक | प्रतिनिधी: गुरुपौर्णिमेच्या पावन पर्वानिमित्त सामाजिक बांधिलकी जपत अंबड पोलीस ठाण्यात गेल्या पाच वर्षांपासून विविध कामांमध्ये योगदान देणारे दिपक विष्णू निकम यांनी प्रेरणादायी उपक्रम राबवला आहे.

यावेळी गुरुपौर्णिमेच्या निमित्ताने पडसाद कर्णबधिर विद्यालय, सिडको, नाशिक येथील विद्यार्थ्यांना ५१ हजार रुपयांची शालेय पाठ्यपुस्तके तसेच इतर आवश्यक शैक्षणिक साहित्य भेट देण्यात आले.

अंबड पोलीस ठाण्यात वेळोवेळी केलेल्या उत्कृष्ट कार्याबद्दल वरिष्ठ अधिकारी, गुन्हे शोध पथकातील पोलीस अधिकारी व अंमलदार तसेच मा. पोलीस आयुक्त यांनी बक्षीस व रिवार्ड स्वरूपात दिलेली मानधनाची रक्कम त्यांनी स्वतःसाठी न वापरता समाजोपयोगी कार्यासाठी खर्च करून खाकी वर्दीतील सामाजिक बांधिलकीचे दर्शन घडविले.

यावेळी दिपक निकम यांनी आपल्या शालेय मित्रांबद्दल कृतज्ञता व्यक्त करत सांगितले की, “शालेय मित्रांकडून मिळालेली प्रेरणाच मला अशा सामाजिक कार्यासाठी सतत प्रेरित करत असते. या प्रेरणेबद्दल मी सर्व मित्रांचे मनःपूर्वक आभार मानतो.”

समाजाप्रती असलेली संवेदनशीलता आणि शिक्षणासाठी केलेले हे योगदान अनेकांसाठी प्रेरणादायी ठरणार असून दिपक निकम यांच्या या उपक्रमाचे सर्व स्तरांतून कौतुक होत आहे.