नाशिककरांनो, आजच पाणीसाठा करून ठेवा! उद्या संपूर्ण शहराचा पाणीपुरवठा बंद
द्वारका सर्कलच्या महत्त्वपूर्ण कामासह १७ अत्यावश्यक कामे; १९ ऑगस्टला सकाळचा पाणीपुरवठा कमी दाबाने
नाशिक | प्रतिनिधी
नाशिक शहरातील नागरिकांसाठी महत्त्वाची बातमी आहे. मंगळवार, दि. १८ ऑगस्ट २०२६ रोजी संपूर्ण नाशिक शहराचा पाणीपुरवठा बंद राहणार आहे. शहरातील विविध भागांमध्ये पाणीपुरवठ्याशी संबंधित अत्यावश्यक दुरुस्ती, क्रॉस-कनेक्शन आणि पाइपलाइनची कामे करण्यात येणार असल्याने हा निर्णय घेण्यात आला आहे.
तसेच बुधवार, दि. १९ ऑगस्ट रोजी सकाळचा पाणीपुरवठा कमी दाबाने होण्याची शक्यता आहे. त्यामुळे नागरिकांनी सोमवार, १७ ऑगस्ट रोजीच आपल्या आवश्यकतेनुसार पाणीसाठा करून ठेवावा, असे आवाहन महापालिकेच्या सार्वजनिक आरोग्य अभियांत्रिकी विभागाकडून करण्यात आले आहे.
द्वारका सर्कलच्या कामासाठी महत्त्वाचे क्रॉस-कनेक्शन
द्वारका सर्कल येथे सुरू असलेल्या इंटरचेंजच्या कामासाठी ५०० मिमी व्यासाच्या गुरुत्ववाहिनीचे क्रॉस-कनेक्शन करणे आवश्यक आहे. या कामासाठी विद्यमान गुरुत्ववाहिनीचा तात्पुरता पाणीपुरवठा बंद करणे आवश्यक असल्याने संपूर्ण शहरातील पाणीपुरवठ्यावर परिणाम होणार आहे.
या शटडाउनच्या कालावधीत महापालिकेकडून शहरातील पाणीपुरवठा व्यवस्थेशी संबंधित विविध १७ अत्यावश्यक कामे पूर्ण करण्यात येणार आहेत.
शहरातील विविध भागांमध्ये दुरुस्तीची कामे
या कामांमध्ये चढ्ढा पार्क, कल्पतरू नगर, भवानी माता आणि पवननगर जलकुंभांवरील व्हॉल्व्ह दुरुस्ती, गांधीनगर जलशुद्धीकरण केंद्रातील कामे, विविध ठिकाणच्या पाइपलाइन गळतीची दुरुस्ती, नवीन जलकुंभांना पाइपलाइन जोडणी तसेच गांधीनगर ते नाशिकरोड या ९०० मिमी व्यासाच्या गुरुत्ववाहिनीच्या दुरुस्तीचा समावेश आहे.
याशिवाय विहीतगाव, नाशिकरोड, सातपूर, पंचवटी आणि इतर भागांमध्येही पाणीपुरवठा व्यवस्थेशी संबंधित कामे करण्यात येणार आहेत.
