नाशिक: नाशिक-त्र्यंबकेश्वर येथे होणाऱ्या सिंहस्थ कुंभमेळा २०२७ च्या पार्श्वभूमीवर सुरू असलेल्या विविध विकासकामांना गौण खनिजाच्या (मुरूम, खडी, गिट्टी, दगड) तीव्र तुटवड्याचा फटका बसला आहे. वेळेत पुरवठा होत नसल्याने अनेक कामांचा वेग मंदावला असून, या समस्येवर तातडीने तोडगा काढण्यासाठी जिल्हा प्रशासनाने आज, शुक्रवारी (दि. २१) खानपट्टेधारक आणि ठेकेदारांची महत्त्वाची बैठक बोलावली आहे.
सिंहस्थ कुंभमेळ्यासाठी शहरात रस्ते विकास, भराव, सब-बेस, बेस आणि काँक्रीटीकरणाची कामे मोठ्या प्रमाणावर सुरू आहेत. या सर्व कामांसाठी मुरूम आणि खडीची अफाट गरज असते. मात्र, गेल्या काही दिवसांपासून मागणीनुसार गौण खनिज उपलब्ध होत नसल्याच्या तक्रारी कंत्राटदारांकडून प्रशासनाकडे प्राप्त झाल्या होत्या.
बैठकीत नेमकी काय चर्चा होणार?
-
मागणी व पुरवठ्याचा आढावा: ठेकेदारनिहाय गौण खनिजाची नेमकी मागणी किती आहे आणि बाजारात उपलब्ध साठा किती आहे, याचा अचूक हिशोब घेतला जाईल.
-
नियोजनबद्ध पुरवठा: सिंहस्थाच्या वेगवेगळ्या कामांचे वर्गीकरण करून प्राधान्यक्रमानुसार खनिजाचे वाटप व पुरवठा करण्याचे नियोजन केले जाईल.
-
अडचणींवर तोडगा: खानपट्टेधारकांना येणाऱ्या अडचणी जाणून घेऊन पुरवठ्यातील अडथळे दूर करण्याचा प्रयत्न केला जाईल.
ही बैठक सायंकाळी ५ वाजता अल्पबचत भवन येथे पार पडणार आहे. प्रशासनाच्या या तातडीच्या हस्तक्षेपामुळे गौण खनिजाचा पुरवठा सुरळीत होऊन रखडलेल्या विकासकामांना पुन्हा एकदा गती मिळेल, अशी अपेक्षा व्यक्त केली जात आहे.
