सिडकोत शिंदे सेनेच्या विभागप्रमुखावर कोयत्याने प्राणघातक हल्ला
जुन्या वादातून हल्ला; तीन हल्लेखोर सीसीटीव्हीत कैद, पोलिसांची धरपकड मोहीम
नवीन नाशिक प्रतिनिधी /: सिडको परिसरात जुन्या वादातून शिंदे सेनेचे विभागप्रमुख सुयश पाटील यांच्यावर कोयत्याने प्राणघातक हल्ला झाल्याची घटना मंगळवारी (दि. १४) रात्री दत्त चौक येथे घडली. या हल्ल्यात पाटील गंभीर जखमी झाले असून त्यांच्यावर खासगी रुग्णालयात उपचार सुरू आहेत.
प्राप्त माहितीनुसार, सुयश पाटील हे सेंट्रल पार्क परिसराच्या पाठीमागील त्यांच्या ‘सप्तशृंगी टूर्स अँड ट्रॅव्हल्स’ कार्यालयाबाहेर दुचाकीवर बसले असताना, चार ते पाच जणांच्या टोळक्याने पाठीमागून अचानक हल्ला चढवला. हल्लेखोरांनी कोयत्याने वार करत पाटील यांना गंभीर जखमी केले. या घटनेत मोठ्या प्रमाणात रक्तस्राव झाला.
हल्ल्यानंतर आरोपींनी पाटील यांच्या कार्यालयाची नासधूस केली. परिसरातील नागरिकांनी तातडीने मदत करत जखमी पाटील यांना जवळील खासगी रुग्णालयात दाखल केले.
या प्रकरणातील पंकज सोनवणे, विजय कांची, वैभव निकम यांच्यासह अन्य संशयित हल्लेखोर सीसीटीव्ही कॅमेऱ्यात कैद झाले असून, हल्ला पूर्वनियोजित असल्याची शक्यता पोलिसांनी व्यक्त केली आहे.
घटनेनंतर अंबड पोलिस ठाण्याच्या पथकाने परिसरात बंदोबस्त वाढवून रात्री उशिरापर्यंत धरपकड मोहीम राबवली. काही संशयितांना ताब्यात घेण्यात आले असून पुढील तपास सुरू आहे.
