प्रभाग क्र. २८ मधील २६ ठिकाणी गतीरोधक उभारणीमुळे वाहतूक सुरक्षिततेला चालना

नाशिक : प्रभाग क्र. २८ मधील बुरकुले हॉल ते फडोळ नगर या महत्त्वाच्या मार्गावर भरधाव वेगाने धावणाऱ्या वाहनांमुळे वारंवार अपघाताचा धोका निर्माण होत होता. विशेषतः शालेय विद्यार्थी, ज्येष्ठ नागरिक, महिला आणि पादचारी यांना रस्ता ओलांडताना मोठ्या अडचणींचा सामना करावा लागत होता. या पार्श्वभूमीवर परिसरातील नागरिकांनी अनेक वेळा गतीरोधक बसविण्याची मागणी केली होती. अखेर नागरिकांच्या या दीर्घकालीन मागणीला यश मिळाले असून नगरसेवक शरदभाऊ फडोळ आणि नगरसेविका प्रतिभाताई पवार यांच्या सातत्यपूर्ण पाठपुराव्यामुळे संबंधित मार्गावर गतीरोधक बसविण्यास मंजुरी देण्यात आली आहे.

गेल्या काही महिन्यांपासून या मार्गावरील वाहतुकीचे प्रमाण वाढले असून दुचाकी, चारचाकी तसेच अवजड वाहनांचा वेगही लक्षणीयरीत्या वाढला आहे. परिणामी परिसरातील नागरिकांमध्ये भीतीचे वातावरण निर्माण झाले होते. स्थानिक रहिवाशांनी वेळोवेळी महानगरपालिका प्रशासनाकडे निवेदने देऊन तसेच लोकप्रतिनिधींमार्फत पाठपुरावा करून रस्ते सुरक्षित करण्याची मागणी केली होती. या मागणीची गांभीर्याने दखल घेत नगरसेवक शरदभाऊ फडोळ आणि नगरसेविका प्रतिभाताई पवार यांनी संबंधित अधिकाऱ्यांसोबत प्रत्यक्ष स्थळ पाहणी केली. वाहतुकीची परिस्थिती, अपघाताची शक्यता आणि नागरिकांच्या सुरक्षेचा विचार करून या मार्गावर गतीरोधक उभारणे आवश्यक असल्याचे स्पष्ट झाल्यानंतर महानगरपालिकेकडे सातत्याने पाठपुरावा करण्यात आला, अखेर गतीरोधकांना मंजुरी मिळाली.

याचबरोबर प्रभाग क्र. २८ मधील विविध भागांतील नागरिकांच्या मागणीनुसार एकूण २६ ठिकाणी गतीरोधक उभारण्याचा निर्णय घेण्यात आला आहे. या उपक्रमामुळे भरधाव वेगाने वाहन चालविणाऱ्या चालकांवर नियंत्रण येण्यास मदत होईल आणि वाहतुकीत शिस्त निर्माण होण्यास हातभार लागेल. विशेषतः शाळा, वस्ती परिसर, चौक आणि अंतर्गत रस्त्यांवर अपघातांचा धोका कमी होण्याची अपेक्षा व्यक्त केली जात आहे. स्थानिक नागरिकांनी या निर्णयाचे स्वागत करत समाधान व्यक्त केले आहे. “रस्त्यावरील सुरक्षितता ही केवळ वाहतुकीचा विषय नसून नागरिकांच्या जीविताशी संबंधित बाब आहे. गतीरोधक उभारल्यामुळे लहान मुले, ज्येष्ठ नागरिक आणि पादचारी अधिक सुरक्षितपणे रस्त्यांचा वापर करू शकतील,” अशी प्रतिक्रिया अनेक रहिवाशांनी दिली.

या प्रसंगी नगरसेवक शरदभाऊ फडोळ, नगरसेविका प्रतिभाताई पवार, आबा पवार, बाळासाहेब पवार, चेतन पगार, गणेश खर्जुल, स्वप्नील वाघमारे, साहेबराव चौधरी, कचरू फडोळ, आकाश मोरे, सागर चौधरी, राजेंद्र नेरे, तुळशीराम वाघ, राजेंद्र मोरे, अरुण भोरे, सुशील पाटील, गोरख आवळे, शुभम देवरे, गौरव सूर्यवंशी, एस. व्ही. पाटील, कैतिक आहेर, पंकज ठाकरे, अमित घरटे तसेच परिसरातील ज्येष्ठ नागरिक आणि स्थानिक रहिवासी मोठ्या संख्येने उपस्थित होते. यावेळी उपस्थितांनी लोकप्रतिनिधींनी केलेल्या सातत्यपूर्ण प्रयत्नांचे कौतुक करत भविष्यातही प्रभागातील रस्ते अधिक सुरक्षित, सुस्थितीत आणि नागरिकाभिमुख करण्यासाठी अशाच प्रभावी उपाययोजना राबविण्याची अपेक्षा व्यक्त केली. प्रभाग क्र. २८ मध्ये रस्ते सुरक्षा वाढविण्याच्या दृष्टीने उचललेले हे पाऊल महत्त्वपूर्ण ठरणार असून, नागरिकांच्या दीर्घकालीन मागणीला न्याय मिळाल्याची भावना परिसरात व्यक्त होत आहे.